Katha Muklum kaw wa hkring du nga ai, gumshem Myen hpyen hka sang hpaw Shwegu de matut lung wa
Katha Muklum kaw wa hkring du nga ai, gumshem Myen hpyen hka sanghpaw (15) hpung ni, Shwegu maga de shamu shamawt lung wa nga sai lam chye lu ai.
Ndai gumshem Myen hpyen sanghpaw hpung ni gaw, August shata 25 ya shani hta Katha Muklum de du shang wa sai re, dai ni August shata 27 ya jahpawt hkying 6:00am aten kaw nna, Jet nbungli hte Y-12 nbungli ni shimlam la ya ai hte Shwegu maga de lung wa nga sai lam, shawng lam na lit nga ai salang ni tsun ai kaw na chye lu ai.
Gumshem Myen hpyen hka sanghpaw hpung ni lung wa na shiga na ai majaw, Mali hka lam mayan hta nga ai mungshawa ni hpe gan koi yen na matu, KIA pawng hpawm hpyen hpung ni tau hkrau sadi jaw da ai lam ni nga sai re.
Hka sanghpaw hpung ni lung wa ai lam lapran hta KIA pawng hpawm hpyen hpung ni FPV suicide drone ni hte hkap gap gasat ai lam ni nga ai rai nna, lagaw lam hte shimlam la ya na matu, shamu shamawt hkawm ai gumshem Myen hpyen hpung ni hte KIA pawng hpawm hpyen hpung ni laja lana gasat poi byin ai lam chye lu ai.
Gumshem Myen hpyen ni sanghpaw ntsa kaw nna, Mali Hka mayan nga ai mungshawa mare de, laknak kaji kaba hte hkrup mara gap shadam bun ai sha n-ga, Jet nbungli, Y-12 nbungli kaw nna mung, laja lana bawm jahkrat gasat nga ai re lam chye lu ai.
Ya aten majan laja nga ai Shwegu hpyen man hte Manmaw hpyen maga de, hkarang lam hku hpyen n-gun laknak machyu pala sa na nmai byin ai majaw, hka lam hku bai n-gun dat wa ai hpe KIA pawng hpawm hpyen hpung ni mung ndu lu hkra, hkap shingla gasat nga ding yang re lam, shawng lam na lit nga ai salang ni tsun ai kaw na chye lu ai.
