Shwegu kaw na Manmaw de lung wa ai hka sanghpaw (3) hpe KIA pawng hpawm hpyen hpung ni hkap gap nhtang kau
Shwegu kaw du nga ai gumshem Myen hpyen dap a, hka sanghpaw (14) kaw na gasat sanghpaw (3) Manmaw de lung wa ai lam lapran kaw KIA pawng hpawm hpyen hpung ni hkap shingla gasat ai majaw, Shwegu de bai nhtang yu mat wa ai lam chye lu ai.
Shwegu kaw na Manmaw de shawng lung wa ai gasat sanghpaw (3) hte lagaw dap ni hpe August shata 29 ya shani KIA pawng hpawm hpyen hpung ni, Zinbung kaw laja lana hkap shingla gasat dat ai hta hka sanghpaw hpung ni hpe woi awn lung wa ai Du Kaba madang nga ai wa hkra hkala mat ai majaw, sanghpaw (3) hte bai nhtang yu mat wa ai lam, shawng lam na lit nga ai salang ni tsun ai.
Hkala hkrum ai Myen Du Kaba wa hpe Shwegu dap kaw na, Helicopter hte wa htaw mat ai rai nna, Myen hpyen dap maga ram ram machyi hkrum ai majaw, Mungkan kaw na pat hkum da ai clucter bomb du hkra jai lang wa ai masa re lam, lit nga ai salang ni tsun ai kaw na chye lu ai.
Shwegu hte Manmaw lam hpe makawp da ai, Zinbung bum kaw shara la nga ai, gumshem Myen hpyen hpung ni hpe dai ni August shata 30 ya shani hta KIA pawng hpawm hpyen hpung ni htim gasat zing la lu sai lam, shawng lam kaw nga ai salang ni tsun ai.
Dai na maga hkying 3:00pm aten daram hta mung, Shwegu Muklum sanghpaw daru kaw jahkring da ai, gumshem Myen hpyen hka sanghpaw ni hpe KIA pawng hpawm hpyen hpung ni, suicide drone hte sa gap gasat ai lam nga ai rai nna, gumshem Myen hpyen dap maga mung, Y-12 nbungli, Jet nbungli ni hte nhkring nsa bawm jahkrat gasat nga ding yang re lam, ginra masha ni kaw na chye lu ai.
