Manmaw ginra gasat gala majan bai laja nga

KIA Masat (3) Dap Ba, Manmaw ginra hta gumshem Myen hpyen dap hte KIA pawng hpawm hpyen hpung ni gasat gala majan bai laja nga ai lam chye lu ai.

Manmaw ginra de gumshem Myen hpyen dap a laknak arung arai, malu masha hte hpyen n-gun htaw tawn da ai sanghpaw hpung ni du ai hpang, September shata praw 4 ya jahpawt kaw nna, gasat gala majan laja lana bai byin nga ai lam, lit nga ai salang ni shana wa ai kaw na chye lu ai.

Gumshem Myen hpyen dap ni gaw, KIA pawng hpawm hpyen hpung ni nga ai shara de lagaw lam hku nna htu shadut htim gasat nga ai sha n-ga, nbungli hte mung shani tup ngu na gap gasat nga ai re lam chye lu ai.

Gumshem Myen hpyen dap a hpyen garum sanghpaw ni Manmaw ginra de du wa ai kaw nna, n-gun kaba hte bai htim gasat wa ai majaw, KIA pawng hpawm hpyen hpung ni mung, ninghkap gasat nga ding yang re ai hte lahkawng maga hpyen masa shaja hkat nga ding yang re ai lam chye lu ai.

Shwegu ginra Zinbung grup yin de mung, Semtember shata praw 4 ya shani gumshem Myen dap ni lagaw lam hku nna htu shadut wa ai majaw, KIA pawng hpawm hpyen hpung ni hte gasat gala majan byin nga ai lam matut sagawn chye lu ai.