KIA Dap Ba ( 3 ) hte Dap Ba ( 4 ) ginra ni hta laja lana gasat gala majan byin

KIA Dap Ba ( 3 ) Dap Dung ( 12 ) hte Dap Dung ( 27 ) ginra, KIA hpyen hpung ni nga ai shara de, Banghtan Nawnghkoi Kawng maga kawn shamu shamawt htu lung wa ai Myen hpyen hpung ni hpe, November 14 ya  shani hkying 11:45am aten kaw na shana de hkying 5:00pm aten du hkra, Gadaw Dinghkang Kawng kaw laja lana ninghkap gasat ai lam chye lu ai.

November 15 ya, dai hpawt hkying 8:02am aten kaw nna mung, mani hpawt byin ai shara kaw sha, laja lana bai gap hkat nga ai lam, shawnglam shisawk salang langai shana wa ai.

Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 9 ) ginra, Jai Maw maga kawn lung wa ai Myen hpyen dap Hk.L.Y ( 83 ) Hk.M.Y ( 103 ) na pawnghpawm hpyen n-gun 150 jan hpe KIA hpyen hpung ni, November 14 ya shana maga hkying 1:30pm aten hta Kawng Mu kaw bawm hte hkap shingla dem bun ai kaw na gasat poi byin ai lam chye lu ai.

November 14 ya jahpawt hkying 6:00am aten hta mung, Kuthkai hte Muse lapran na Bang Hkyet, Toe shagyit ( Gate ) makau kaw Myen hpyenla hte Balik ni laiwa laisa mungmasha ni hpe sawk jep nga ai lam, buga masha ni tsun shana wa ai.

Ya aten hta rawt malan hpyen hpung rai nga ai, MNDAA, TNLA, AA hpyen dap ni hte Myen hpyen dap ni, gasat gala majan byin nga ai hpe chye lu ai.