KIA Dap Ba ( 2 ) hte Dap Ba ( 6 ) ginra hta gasat gala majan byin nga

Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 38 ) hpyen hpung ni shara jahkrat nga ai, Hpawng Seng, Shau Shwi kaw Myen hpyen dap Hk.M.Y ( 220 ) na hpyen hpung ni wa htim gap ai majaw, November 29 ya shani hkying 10:00am aten kawn hkying 10:50am aten du hkra, gasat majan byin ai lam, shawnglam shisawk ni kawn chye lu ai.

KIA Dap Ba ( 2 ) Dap Dung ( 14 ) ginra, N-Ga Ga mare baw yi shari kaw shara jahkrat shamu shamawt nga ai Myen hpyen hpung hpe, November 29 ya shana maga hkying 3:00pm aten hta KIA hpyen hpung ni kawn jau gawng ladat hte numdaw mi sahtim gap ai, dai hpang hkying 4:12pm aten kawn hkying 4:30pm aten laman numdaw lahkawng lang bai sahtim gap ai lam chye lu ai.

Ya aten Myen hpyen dap ni gaw, lawu Myen Mung kaw na hpyen n-gun laknak n-gun ni sa ginlen nga ding yang re. November 29 ya shani hta mung, hpyen mawdaw 14 hta hpyenla hpring hpring htaw nna, Mugawng Mile 8 lam hku Ka Mai lam maga lai lung wa sai lam, buga masha ni kawn chye lu ai.