Kumtsai Yang mare uphkang salang hte hpung woi sara ni hpe Myen hpyen ni zuphpawng woi galaw
KIA Dap Ba ( 2 ) Dap Dung ( 20 ) ginra, Kumtsai Yang mare hta du nga ai, Dapnu ( 101 ) na hpyen hpung ni, December praw 8 ya shana hkying 7:00pm aten hta KBC nawku jawng kaw mare uphkang salang hte hpung woi sara ni hpe zuphpawng woi galaw tsun sadi jaw ai lam, ginra shisawk ni kawn chye lu ai.
December praw 8 ya shani gaw, Kumtsai Yang mare hte hpa lung lahkawng daram sha tsan ai kaw KIA hpyen hpung hte Myen hpyen hpung ni gasat majan byin ai re.
Dai Myen hpyen ni mare uphkang salang hte hpung woi sara ni hpe tsun ai gaw, KIA ni hpe nanhte tsun yang lu ai, sinat bawm nsen ngoi ai nna mayu ai matut nna bai ngoi ai lam ni byin wa yang, nanhte a mare gaw hten mat na re, ngu tsun sadi jaw ai lam chye lu ai.
Myen hpyen hpung n-gun ( 50 ) daram gaw, ya aten Kumtsai Yang mare KBC nawku jawng wang hta shara jahkrat nga ai majaw, laban shani nawku lamang galaw na pyi yak na masa nga ai lam, buga masha ni tsun shana wa ai kawn chye lu ai.
