KIA Dap Dung ( 6 ) Dap Dung (12 ) Dap Dung ( 26 ) ginra ni hta majan matut byin
KIA Dap Ba ( 2 ) Dap Dung ( 6 ) ginra, Sawnghka mare hte Labang Kahtawng mayan hkan shamu shamawt nga ai Hk.L.Y ( 256 ) dap na hpyen hpung hte KIA hpyen hpung ni, December 15 ya shani hkying 10:10am aten hta Laika Galai kaw majan byin ai lam, shawnglam shisawk ni kawn chye lu ai.
KIA Dap ( 3 ) Dap Dung ( 12 ) ginra, Banghtan, Gadaw Nhkang bum maga na htu lung wa ai Myen hpyen hpung hte KIA hpyen hpung ni, December 15 ya shani ka-ang hkying 12:50pm aten kawn hkying 1:30pm aten du hkra Ulu Hkyet kaw gap hkat ai.
Lahkawng maga gap hkat zim ai hpang Myen hpyen dap ni, Maji Kung Kaji, Banghtan, Loihkam, Gadaw Nhkang Bum kaw na sinat kaba hpan hkum hte KIA ni nga ai maga de gap sharu bun ai lam chye lu ai.
KIA Dap Ba ( 8 ) Dap Dung ( 26 ) hpyen hpung ni a shawnglam Nawng Mu post maga de, Hk.L.Y ( 257 ) dap ni htu lung wa ai majaw, December 15 ya shani hkying 1:30pm aten hta majan byin ai.
Shana maga hkying 3:40pm aten hta Nawng Lut Pa, KIA ni a Great Wall Post maga de Myen hpyen hpung ni htu lung wa ai majaw, numdaw mi bai gap hkat ai re.
Daini December 16 ya shani hta mung, jahpawt hkying 5:00am aten kaw na KIA Dap Dung ( 26 ) ginra, Nawng Mu post shara hta gasat majan matut byin nga ai lam chye lu ai.
