KIA Dap Ba ( 3 ) hte Dap Ba ( 5 ) ginra ni hta majan byin
KIA Dap Ba ( 3 ) Dap Dung ( 12 ) hpyen hpung ni shara jahkrat nga ai Marit Hkyet maga de, Myen hpyen ni htu lung wa ai majaw, December 22 ya jahpawt hkying 9:24am aten hta gasat majan byin ai lam, shawnglam shisawk ni kawn chye lu ai.
Matut nna, KIA Dap Dung ( 27 ) hpyen hpung ni nga ai maga lung wa ai Myen hpyen hpung hte KIA hpyen hpung ni Hka Kan lahta Sha-U Bum kaw mung, gasat majan byin ai.
KIA Dap Ba ( 5 ) Dap Dung ( 18 ) ginra, Sut Shang kawn rawt wa ai Myen hpyen dap, Hk.L.Y ( 93 ) na hpyen hpung hpe, December 22 ya jahpawt hkying 7:00am aten hta Lazing Kawng mare htum pa kaw KIA hpyen hpung ni bawm hkap dem bun dat ai lam chye lu ai.
KIA hpyen hpung ni bawm dem bun ai hpang Ntap Bum, Lahkra Bum hte Awng Ja kaw nga ai Myen hpyen dap ni mung, 60mm 81mm ngu maram lu ai sinat kaba ni hte hkrup mara gap bun ai lam, salang langai shana wa ai.
Namsan Yang kawn Lazing Kawng maga yu wa ai Myen hpyen dap, Hk.M.Y ( 309 ) na hpyen hpung ni mung, December 22 ya shani sha Chyahkya hka kau kaw KIA hpyen hpung ni hkam da ai bawm langai bai kapaw la ai lam nga ai.
Bawm kapaw la ai Hk.M.Y ( 309 ) ni hpe Hk.L.Y ( 271 ) dap ni sa tau la nna, bai wa ai kaw KIA hpyen hpung ni bawm ( 5 ) hte matut adem bun ai lam chye lu ai.
