KIA Dap Dung ( 9 ) Dap Dung ( 17 ) Dap Dung ( 27 ) ginra ni hta gasat gala majan byin

KIA Dap Ba ( 3 ) Dap Dung ( 27 ) ginra, Lahkra Daw mare dingsa hte Man Loi mare lapran kaw, December 24 ya jahpawt hkying 8:02am aten hta KIA Dap Dung ( 27 ) na hpyen hpung hte Myen hpyen hpung ni gasat majan byin ai lam, shawnglam shisawk ni kawn chye lu ai.

Hkying 1:55pm aten hta KIA Dap Dung ( 27 ) hpyen hpung ni shara jahkrat nga ai Man Loi mare baw kawng de, Myen hpyen hpung ni matut htim lung wa ai majaw, numdaw mi bai majan byin ai.

Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 9 ) ginra, Namhpak Ka kaw Dap Jung nga ai Myen hpyen dap, Hk.L.Y ( 123 ) Dap hpe December 24 ya shana daw hkying 2:10pm aten KIA hpyen hpung ni sinat kaba sa gap bun ai kawn gasat majan byin ai. Dai hpang KIA hpyen hpung ni sinat kaba 82mm hte 4 lang bai sa gap bun ai lam chye lu ai.

Hkying 2:20pm hta mung, KIA Dap Dung ( 9 ) ginra, ၇င္ကြဲေတာင္ kaw shara jahkat nga ai Myen hpyen hpung ni hpe, TNLA hpyen hpung ni sahtim gap ai kawn gasat majan byin ai.

December 24 ya shani hta sha, KIA Dap Dung ( 17 ) ginra, Bang Gaw mare makau kaw MNDAA Dap Dung ( 211 ) hte Ts.K.Hk ( 10 ) na Myen hpyen hpung ni gasat gala majan byin ai re.

Gasat gala majan byi ai majaw, Bang Gaw mare na mungshawa ni gaw Hpunggyi Jawng kaw sa hprawng yen nga ai lam chye lu ai.