Wunpawng Mungdan Shanglawt Kongsi Ningbaw Kaba magam lit ap ya ai akyu hpyi hpawng galaw

Wunpawng Mungdan Shanglawt Hpung Ginjaw Komiti Tingnyang Up Wunpawng Mungdan Shanglawt Kongsi Ningbaw Kaba Magam lit hpe ap ya ai akyu hpyi hpawng hpe, January praw 2 ya jahpawt hkying 9:00am aten hta Laiza Muklum Padang Hkrunlam Majan Masing Woi Awn Rung hta galaw ai lam chye lu ai.

Hpawng lamang hta Wunpawng Mungdan Shanglawt Hpung Ginjaw Komiti Tingnyang Up Usa, Wunpawng Mungdan Shanglawt Kongsi Ningbaw Kaba Usa, Salang Lanyaw Zawng Hra hpe Dap pru hkringsa ahkang lakmat jaw ai lam galaw ai.

Ningbaw Kaba Usa, Salang Lanyaw Zawng Hra kaw nna Wunpawng Mungdan Shanglawt Hpung Ginjaw Komiti Tingnyang Up lit, Wunpawng Mungdan Shanglawt Kongsi Ningbaw Kaba lit hte Wunpawng Mungdan Shanglawt Hpyen Dap Dap Up Daju magam lit ni hpe, Ginjaw Komiti Tingnyang Up, Kongsi Ningbaw Kaba ningnan rai sai Du Daju Jum Nban La hpe ap ya ai.

Pru hkringsa sai Ningbaw Kaba Usa hpe Wunpawng Mungdan Shanglawt Hpung Ginjaw Komiti, Wunpawng Mungdan Shanglawt Kongsi hte Magam Dap Ginjaw Rung, Ginwang Ginjaw Komiti, Ginjaw Amyu Shayi ni kaw nna shagrau kumhpa jaw ai lam galaw ai.

Ningbaw Kaba Usa kaw nna numhtet numra ga shaga ai, dai hpang Ningbaw kaba Du Daju Jum Nban La kaw nna mung, mungga shaga nna hpung woi sara ni akyu hpyi shaman ya ai.

Wunpawng Mungdan Shanglawt Hpung Ginjaw Komiti Tingnyang Up, Wunpawng Mungdan Shanglawt Kongsi Ningbaw kaba galaw lai wa sai marai 5 kaw na, ya na zawn lamang hte hkrak rai nna Ningbaw Kaba magam lit hpe lahpa galai ap ya ai gaw shawng ningnan lang rai nga ai.

Ningbaw Kaba Usa Salang Lanyaw Zawng Hra gaw, Shanglawt Rawt Malan magam bungli hpe shaning 50 ning jan apnawng galaw gun hpai lai wa ai hta hkumhkrang hkamja lam ra rawng wa ai majaw, Magam Dap kaw nna pru hkringsa ahkang la ra mat ai lam hpe chye lu ai.