KIA hte Myen hpyen hpung ni gasat gala majan byin

Sinpraw Ginwang Ginjaw, KIA Dap Ba ( 3 ) Dap Dung ( 27 ) ginra hta shamu shamawt hkawm ai Myen hpyen dap, Dapnu ( 88 ) kata na hpyen hpung ni, KIA Dap Dung ( 27 ) hpyen hpung ni nga ai maga de htu lung wa ai majaw, January 13 ya shana maga hkying 2:20pm aten hta Nam Hka bum kaw gasat majan byin ai lam chye lu ai.

Daini January 14 ya hkying 10:20am aten hta mung, KIA Dap Dung ( 27 ) hpyen hpung hte Myen hpyen dap, Dapnu ( 88 ) kata na hpyen hpung ni Pungling mare dingsa kaw gasat majan matut byin ai lam, salang langai shana wa ai.

Kaihtik hte Mandat kaw nga ai Myen hpyen dap ni mung, majan byin nga ai grup gra de, laknak kaba hpan hkum hte gap sharu bun ai lam chye lu ai.