Mam htaw ai mungmasha ni hpe Myen hpyen dap ni sinat kaba hte gap bun
Sinna Ginwang Ginjaw, KIA Dap Ba ( 2 ) Dap Dung ( 14 ) ginra, N-ga Ga mare kaw shara jahkrat nga ai Myen hpyen hpung ni gaw, January 14 ya shana maga hkying 2:00pm aten daram hta Gadung Na hkauna pa kaw Mam htaw ai mungchying masha ni hpe 81mm ngu maram lu ai sinat kaba hte 2 lang gap bun ai lam, buga na salang langai shana wa ai.
Masha kaw hkra hkala ai lam nnga ai raitim, pala hkyep langai gaw yi wa kaw wa hkra ai, dai majaw Mam htaw ai mungmasha ni hkrit nna Danai de wa hprawng nga mat ai lam, salang wa tsun ai.
Danai lahta maga de mung, Myen hpyen dap ni kawn mungmasha ni hpe yi sun hkauna hte nam de tsep kawp nsa na matu, laja lana tsun da ai lam ni nga ai, rai yang anhte mungmasha ni gaw, yi sun hkauna kaw she galaw lu galaw sha nga ai majaw dai hpe nlu galaw jang gaw grai yak hkak wa mai ai, nga nna salang wa tsun ai.
Ya aten Myen hpyen dap ni gaw, Myitkyina, Danai lam de laiwa laisa mungmasha ni hpe laja lana san jep nga ai hta gara de sa, gara kaw nga ai lam ni san ai, Mungchying masat ( မွတ္ပုံတင္ ) ni san ai, Hpung magam gun ni hpe rai yang Chyum laika buk hpaw galam yu ai madang du wa ai lam, buga masha ni tsun ai kawn chye lu ai.
