KIA hte Myen hpyen hpung ni gasat gala majan byin

Sinna Ginwang Ginjaw, KIA Dap Ba ( 2 ) ginra, Yuzana site lam masat ( 33 ) salang Myi Pai wa a sun kaw shara jahkrat nga ai Myen hpyen dap, Hk.L.Y ( 251 ) na hpyen n-gun ( 50 ) daram hpe, January 20 ya shani hkying 1:20pm aten hta KIA hpyen hpung ni sa htim gap ai kawn gasat gala majan byin ai lam, shawnglam shisawk ni kawn chye lu ai.

Gasat gala majan byin ngut ai hpang dai shara de KIA hpyen hpung ni 60mm hte 5 lang gap bun ai, Myen hpyen ni mung, sinat kaji kaba hte KIA ni nga ai maga de bai nhtang gap bun ai lam chye lu ai.

Ya aten hta Myen hpyen dap ni gaw hpyen n-gun 200 daram Jahtu Zup mare kaw nna, Hka Mut Nawng hte Sharat Hka mayan hku shamu shamawt du nga ai lam, buga masha ni kawn chye lu ai.