KIA Dap Ba ( 2 ) hte Dap Ba ( 3 ) ginra hta gasat gala majan byin

KIA Dap Ba ( 2 ) Dap Dung ( 11 ) ginra, Male mare kaw du nga ai, Hk.L.Y ( 260 ) dap na hpyen n-gun ( 80 ) daram hte KIA hpyen hpung ni, January 25 ya jahpawt hkying 8:50am aten hta Mali Sut Yang mare lai, Lama Hku kadawng kaw KIA hpyen hpung ni hkap shingla gasat dat ai kawn gasat majan byin ai lam, shawnglam shisawk ni kawn chye lu ai.

KIA Dap Ba ( 3 ) Dap Dung ( 27 ) ginra hta mung, January 26 ya jahpawt hkying 9:03am aten hta KIA hpyen hpung ni shara la nga ai Bumchyang Bum kaw Hk.M.Y ( 8 ) dap na hpyen n-gun ( 100 ) daram hte numdaw mi gasat majan byin ai.

Hkying 12:44pm aten hta Myen hpyen hpung ni kalang bai htu lung wa ai majaw, numdaw lahkawng lang gasat poi matut byin ai. Kaihtik hte Loi Jawm bum kaw dung ai Myen hpyen dap ni mung, KIA hpyen hpung ni nga ai Bumchyang bum maga de, lanak kaba 105mm, 120mm ni hte gap bun nga ai lam chye lu ai.

KIA hpyen dap hte Myen hpyen dap ni gasat gala majan byin ai hta Myen hpyen dap ni gaw, Mungshawa ni nga ai maga de laknak kaba majoi gap bun wa ai majaw, KIA Dap Ba ( 1 ) Dap Dung ( 7 ) ginra, Nhtan Zup mare, Sut Mai Yang hte Ndup Yang hpyen yen mungshawa yawng marai 900 daram gaw nam de, dumbru dumbra hprawng yen nga ai lam chye lu ai.