Wunpawng Mungdan Shanglawt Hpung Ginjaw Komiti Tingnyang Up a ga shaka la hpawng
Ga shaka la hpawng hpe January 27 ya jahpawt hkying 8:00am aten kawn shani hkying 11:00am aten du hkra Laiza Muklum, Padang Gawknu kaw galaw ai.
Rev. Fr. Joseph Nbwi Naw kaw na hpawng hpaw akyu hpyi ya nna KBC Nawku Hpung, RCM Nawku Hpung, Anglican Nawku Hpung, WMR, PCG hte Myu Shayi ni hku nna, Magun lit hte shagrau ya ai. Dai hpang Wunpawng Mungdan Shanglawt Kongsi Ningbaw Du Daju Jum Nban La kaw nna Wunpawng Myusha Dawnghkawn hpe magra jum let Ga Shaka hkam la sai.
Wunpawng Mungdan Shanglawt Kongsi Ningbaw Du Daju Jum Nban La a matu laksan Bishop John Zau Li kawn akyu hpyi ya ai hte KBC, RCM, Anglican na Sara ni, Bishop, Saradaw, Jau ni, WMR, PCG na salang ni hku na mung n-gun jaw shatsam ga shaga ai.
Dai hpang Wunpawng Mungdan Shanglawt Hpung Ginjaw Komiti Tingnyang Up kaw na Mungga shaga ai. Saradaw Francis Daw Tang hku na mung Chyoipra ai Chyum Laika hte rau Karai Mungga hpe htawn tsun ai hte hpawng hpe angwi apyaw ngut kre la lu sai re.
Hpawng hta Magam dap shara shagu na magam gun salang ni, Makam Masham hpung shagu na Hpung Woi sara kaba ni, Party Hpung Shang salang ni hte Mung shawa ni sa du shang lawm ai lam chye lu ai.
