KIA hpyen hpung hte Myen hpyen hpung ni gasat gala majan matut byin
KIA Dap Ba ( 2 ) Dap Dung ( 14 ) ni a Dawi post kaw, January 29 ya jahpawt hkying 9:00am aten kawn hkying 1:00pm aten du hkra, KIA hpyen hpung hte Myen hpung ni gasat gala byin ai lam, shawnglam shisawk ni shana wa ai kawn chye lu ai.
KIA Dap Ba ( 1 ) hte Dap Ba ( 2 ) ginra ni hta Myen hpyen dap ni gaw, hpyen n-gun law law hte wa htim gasat ai sha n-ga laknak kaba hte nbungli ni hte mung, laja lana wa gap gasat nga ai re.
Ya na zawn Myen hpyen ni nbungli hte wa gap gasat, bawm ni wa jahkrat bun ai majaw, mara kata mungmasha nkau mi si sum ai lam, nkau mi gaw hkala nba byin hkrum ai lam, bai nkau gaw nam de dumbri dumbra hprawng yen hkawm nga ai lam na chye lu ai.
KIA hpyen hpung hte Myen hpyen hpung ni gasat gala majan byin ai hta Myen hpyen ni gaw, Nam Gawn mare kaw du nga ai mungshawa Num, Ma ni hte asak 50 ning jan sai dinggai dingla ni hpe gaw, January 29 ya shana maga hkying 4:40pm aten hta Nam Gawn jakli daru kaw dat ya ai lam nga ai raitim, asak naw ram ai ni hpe gaw Nam Gawn mare de bai woi mat ai lam, buga masha ni kawn chye lu ai.
