Myen hpyen hpung ni hte KIA hpyen hpung ni gasat gala majan byin
KIA Dap Ba ( 2 ) Dap Dung ( 14 ) ginra hta March praw, 5 ya shani hkying 11:15am hte hkying 11:55am aten laman, Awng Ba Pat Maw kawng maga de Myen hpyen hpung n-gun kaba htu shadut lung wa ai majaw KIA hte Myen hpyen hpung ni gasat majan byin ai lam shawng lam shi sawk ni shana wa ai kawn na chye lu ai.
Ding Hkun hka mahkrai mayan kaw mung shani hkying 11:40am hte hkying 12:10pm aten laman Tsan Lun Maw maga shamu shamawt lung wa ai Myen hpyen hpung ni hte KIA hpyen hpung ni gasat gala majan byin ai. Shana daw hkying 5:55pm hte hkying 6:30pm aten laman numdaw kalang mi bai gasat majan byin ai. Gasat majan byin ai shara de Tsan Lun mare kaw nga ai Myen hpyen hpung ni kawn laknak kaba ( 10 ) jan lang gap bun ai hta Nam Hkam mare Hpaji Jawng kaw laknak kaba ( 2 ) wa hkrat ai lam chye lu ai.
March praw, 5 ya shani hta sha hkying 2:25pm hte hkying 2:40pm aten laman Lapu Hka maga de na shamu shamawt lung wa ai Myen hpyen hpung ni hte KIA hpyen hpung ni ang katut gasat majan byin ai.
KIA Dap Ba ( 1 ) Dap Dung ( 7 ) ginra hta mung March praw, 5 ya shani hkying 12:00noon hte hkying 12:40pm aten laman Tayang Zup hku lung wa ai Myen hpyen hpung ni hpe KIA hpyen hpung ni kawn Kawa Pa hte Hting Bai lapran kaw Remote Bom, 79 MM sinat ni hte hkap gap bun ai kawn gasat gala majan byin wa ai lam na chye lu ai.
