Dap Dung ( 14 ) ginra hta gasat gala majan byin
Sinna Ginwang Ginjaw, KIA Dap Ba ( 2 ) Dap Dung ( 14 ) ginra, Namhkam mare kaw du nga ai Myen hpyen hpung ni, KIA Dap Dung ( 14 ) hpyen dap de shamu shamawt lung wa ai majaw, March praw 9 ya shana daw hkying 2:20pm aten hta Nam Mana hka mahkrai mayan kaw gasat gala majan byin ai lam, shawnglam shisawk ni kawn chye lu ai.
Myen hpyen hpung ni gaw, March praw 5 ya shani kaw nna, KIA ni shara la nga ai Awng Ba Pat Maw maga de hpyen n-gun kaba hte htu shadut lung wa ai majaw, KIA hpyen hpung hte gasat majan byin nga ai re.
March praw 5 ya shani hta sha, Ding Hkun hka mahkrai mayan kaw numdaw lahkawng lang gap hkat ai lam nga ai, Lung Jung pa baw, Jum hka mayan kaw mung gasat majan byin ai.
Myen hpyen dap ni gaw ya aten hta, hpyen n-gun laknak n-gun law law hte KIA Dap Ba ( 1 ) Dap Ba ( 2 ) Dap Ba ( 9 ) ginra de, matut manoi hpyen n-gun jat nga ai lam, buga masha ni shana wa ai kawn chye lu ai.
