Myen hpyen hpung hte KIA hpyen hpung ni gasat gala majan byin

KIA Dap Ba ( 2 ) ginra hta shamu shamawt nga ai Myen hpyen hpung hte KIA hpyen hpung ni, March 23 ya jahpawt hkying 8:00am aten daram kaw nna shana daw hkying 2:40pm aten daram du hkra Lidu lam deng 7 hte deng 8 lapran kaw gasat gala majan byin ai lam, shawnglam na salang langai shana wa ai.

Gasat majan byin ai shara de Danai hpyen dap kawn laknak kaba hte gap bun ai, hpyen shamu shamawt lam mung ding yang rai nga ma ai, dai majaw majan gaw aten ntam ai matut byin wa mai ai lam, salang wa tsun ai.

Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 36 ) ginra hta mung, Hk.M.Y ( 219 ) dap na hpyen n-gun 60 daram hte KIA hpyen hpung ni, March 12 ya shana de hkying 5:30pm aten hta Man Kawng mare hte Yi Hku mare lapran kaw gasat majan byin ai lam chye lu ai.