Myen hpyen dap ni laknak kaba gap bun ai majaw mungshawa marai 3 hkala hkrum

KIA Dap Ba ( 3 ) Dap Dung ( 1 ) ginra rai nga ai, Lung Ja kaw dap jung nga ai Hk.L.Y ( 105 ) dap ni gaw, March 31 ya jahpawt manap hkying 3:35am aten daram kaw na hkying 4:00am aten du hkra Dansa Pa maga de 105mm ngu maram lu ai laknak kaba hte 12 lang gap bun ai majaw, mungmasha marai 3 hkala hkrum ai lam, ginra shisawk ni shana wa ai.

Hkala hkrum ai ni gaw, Jan. Mahkaw Hkawn Lum Asak 48 ning, Jan. La Wang Hkawn Bu Asak 47 ning, Salang Zinhtung La Asak 43 ning, ni re. Salang Zinhtung La hte Jan. La Wang Hkawn Bu yan gaw lata kaw hkra nna, Jan Mahkaw Hkawn Lum gaw myi man kaw hkra ai.

Ndai hkala hkrum ai marai 3 gaw Munghkawng hpyen yen, Manje hpyen yen hte  Manmaw Roberts hpyen yen dabang na rai nna, hpun galaw ai Dansa Pa de gat sa dut ai kaw byin hkrum ai re.

Machyi hkala hkrum ai ni gaw, Nba Pa mungshawa tsi rung kaw tsi tsi  hkamla ai lam chye lu ai.