Pawng hpawm hkungran ga shaka la akyu hpyi hpawng galaw

Dinghku de tim hkungran ga shaka nla shi ai magam gun htinggaw 42 a pawng hpawm hkungran ga shaka la akyu hpyi hpawng hpe, April praw 7 ya shani hkying 10:00am aten hta Laiza Muklum Sinpraw Majoi Manau Gawknu hta galaw ai lam chye lu ai.

Ndai lamang hpe galaw na matu, Ginjaw Komiti kaw nna lam masan ya ai hte Ninggawn Daju Pati Komiti ni madung lit la let, KIO Tingnyang Up, KIC Ningbaw Kaba dum nta masha ni, kanu kawa tai ya nna galaw ai lam re.

Ningbaw Kaba Nban La kaw nna mung, magup sumhpa hpaji jaw mungga tsun ai hta, Karai Kasang a man, Masha a man tara shang ai hkungran num/la rai ra ai, magam gun ai ten hta mung, tara shang ai dinghku nrai jang magam dap kaw na garum ningtum lu na nmai byin ai, mayun mayoi dinghku ngu gaw hpa lam hta mung dut dang ai lam byin chye ai, dai majaw Karai Kasang a man hta mung, asuya a man hta mung, mungshawa daw tsa a man hta mung, tara shang hkungran ya ai lam re, nga tsun ai.

Dai ni magam dap kaw nna dinghku de ya ai lam gaw, majan nhpan prat aten hta yak hkak ai lam amyu myu a majaw dinghku gaw de ra asak gaw kaba wa gaga mahkrun hku nna nlu galaw ai majaw, mayun mayoi rai nna dinghku de hkat ai hpe htunghking hku nna mung nlu galaw makam masham hku nna mung nlu galaw ai hpe magam dap hta kanu kawa tai ya nga ai ni hku nna mai byin ai ladat hte tara shang dinghku de ya ai re lam chye lu ai.