Myen hpyen hpung ni Mungshawa ni nga ai shara de Sinat kaba gap bun ai majaw Mungshawa ni hkra hkala ai hte asak si sum mat
KIA Dap Ba ( 2 ) ginra Danai ( D.K.Ts ) dap ni April, 11 ya shani hkying 2:05pm aten kawn hkying 5:30pm aten laman KIA Dap Ba ( 2 ) H.Q grup yin kata de 105MM ngu maram lu ai Sinat kaba ( 20 ) jan lang gap bun ai hta Sinat kaba si ( 1 ) Mungshawa langai a nta makau kaw wa hkrat ai majaw Mungshawa marai ( 2 ) hkra hkala ai hte asak si sum mat ai lam na chye lu ai.
Yi kaw na wa ai Awng Lawt mare kaw nga ai Slg. Npawp Yaw a lahput kaw dingtset hkra hkala nna, kasha rai nga ai Shd. Npawp Naw Ring Asak ( 22 ning ) gaw Sinat kaba si pala hkyep sinda kaw shang ai hte hkum hkan mung dingtset hkra ai majaw asak si sum mat ai lam chye lu ai.
Laiza Muklum, Lawa Yang maga de mung April, 11 ya shana daw hkying 4:30pm aten daram kaw Laja Yang kaw dap jung nga ai Myen hpyen hpung ni kawn 82 MM hte 5-6 lang gap bun ai majaw Mungshawa marai ( 1 ) asak si sum ai hte marai ( 3 ) hkra hkala ai lam chye lu ai.
Lai Nawng Hku maga de yi sun sa galaw nga ai Loi Seng mare na Slg. Kareng Tang Gun, Kahtan Yang mare na Slg. Lahpai Tu, Slg. Tangbau Ma Di, Si En mare na Slg. Lahpai Naw, Nam Sheng mare na Slg. Maran Doi Awng hte Nam Ya mare na Slg. Labya Tang ni hpe April, 11 ya shani Myen hpyen hpung ni kawn rim woi mat ai rai nna, Nam Si En mare na Mungshawa marai ( 3 ) mat taw nga ai lam hpe mung chye lu ai.
