Myen hpyen hpung ni hte KIA hpyen hpung ni gasat majan byin

KIA Dap Ba ( 2 ) H.Q makau Sut Mai kaw April, 16 ya, dai ni hkying 1:00pm aten hta Myen hpyen hpung ni hte KIA hpyen hpung ni laja lana gasat majan byin nga ai lam shawng lam shi sawk ni kawn chye lu ai.

KIA Dap Ba ( 2 ) Dap Dung ( 11 ) ginra, Dum Bung mare na Mungshawa ni hpe April, 15 ya shani Myen hpyen dap Hk.L.Y ( 297 ) na hpyen hpung ni kawn hpyen masa lak lai nna shuk wa na re ngu tsun ai majaw Mungshawa ni Namti hte Mu Gawng mare de htawt sit yen nga ai lam na chye lu ai.

Loi Nawng Hku maga de N-gu gun sa ai Mungshawa marai ( 17 ) hpe April, 11 ya shani hkying 11:15am aten hta Mazup mayan kaw Myen hpyen hpung ni rim woi mat nna April, 15 ya shana daw hkying 5:30pm aten hta bai dat ya sai lam chye lu ai.