Myen hpyen dap ni mungshawa ni a hkauna pa hku lam galaw kau ya

KIA Dap Ba ( 3 ) Dap Dung ( 1 ) ginra hta shamu shamawt nga ai Myen hpyen dap ni gaw, April 13 hte 14 ya shani hta Manje Myu, Pin Oo lui lawk na mungshawa htinggaw 6 a hkauna pa hpe, ga kanaw jak hte lam galaw kau ya ai lam, buga na salang langai shana wa ai.

Myen hpyen dap ni gaw, ndai hkauna pa hku lam galaw na hte seng nna mare uphkang rung de shana ai lam nnga ai, mungmasha ni hpe gaw mare shinggan de kadai npru hkawm lu na nga tsun nhtawm, shanhte gaw ya na zawn lam galaw kau ya ma ai, nga nna salang wa tsun ai.

Lam ganaw kau hkrum ai hkauna ni gaw, Salang Hkang, Slg. Maran Naw Hkam, Slg. Hpaudau Brang, Slg. Lawang Tang, Slg. Maru La, Slg. Lahkang Awng Jan ni a hkauna re.

Hkauna madu ni gaw ndai lam hte seng nna hparan ya na matu, mare uphkang salang ni hpe sa tsun da ai hte April 16 ya shani gaw mare uphkang salang ni, hkauna pa de sa yu sai raitim, hpa nga mahtai njaw shi ai lam chye lu ai.