Myen hpyen hpung ni hte KIA hpyen hpung ni gasat majan byin

Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 36 ) ginra hta May praw, 4 ya jahpawt daw hkying 6:25am aten hta Winseng Man Kang kaw Myen hpyen dap Dapnu ( 55 ) kata na hpyen hpung ni hte KIA hpyen hpung ni gasat majan byin ai lam shawng lam shi sawk ni kawn chye lu ai.

KIA Dap Ba ( 2 ) H.Q shingdu Kawa Sun mayan kaw May praw, 3 ya jahpawt hkying 7:47am aten hte hkying 8:00am aten laman Awng Lawt maga shamu shamawt lung wa ai Myen hpyen hpung ni hpe KIA hpyen hpung ni Bom ( 4 ) lang hkap adem bun nna Sinat kaji ni hte bai gap ai kawn gasat majan byin wa ai lam chye lu ai.

Dai hpang, shani hkying 10:06am aten hta Training Pa makau Hpun ret dabang dingsa mayan kaw mung KIA hpyen hpung ni hte Myen hpyen  hpung ni matut gasat majan byin ai.

Shana daw hkying 3:55pm aten hte hkying 4:10pm aten laman Hkamau Hka kau kaw Myen hpyen hpung ni hte KIA hpyen hpung ni gasat majan byin ai hpang, hkying 6:10pm aten hte hkying 6:45pm aten laman Myen hpyen hpung ni Hkamau Hka Mazup lahta mayan hku htu lung wa hpe KIA hpyen hpung ni hkap gap ai kawn numdaw kalang mi bai gasat majan byin lam chye lu ai.

KIA Dap Ba ( 1 ) Dap Dung ( 4 ) ginra hta mung May praw, 3 ya jahpawt daw hkying 3:20am hte hkying 4:40am aten laman Mile ( 19 ) makau na kawng marawn kaw du nga ai Myen hpyen dap Dapnu ( 33 ) kata na hpyen hpung ni hpe KIA hpyen hpung ni sa htim gap ai kawn gasat majan byin wa lam chye lu ai.