Myen hpyen hpung ni hte KIA hpyen hpung ni gasat majan byin
KIA Dap Ba ( 2 ) ginra, Hpung Dung mazup hte Maden Camp dingsa lapran kaw May praw 9, ya shani hkying 11:30am aten hta Myen hpyen dap Dapnu ( 101 ) kata na hpyen hpung ni hte KIA hpyen hpung ni gasat majan byin ai lam shawng lam shi sawk ni kawn chye lu ai.
KIA Dap Ba ( 9 ) Dap Dung ( 6 ) ginra hta mung Nam Jan Hku Awng Len maga kawn Myen hpyen Modo ( 17 ), hpyen n-gun ( 250 ) jan du shatup nga ai hte Nam Jan Hku maga de galaw lu galaw sha nga ai Mungshawa ni hpe Myen hpyen hpung ni kawn pru wa na ahkang pat kau sai ngu nna pru wa ai Mungshawa ni hpe bai gawt nhtang kau ai lam na chye lu ai.
KIA Dap Ba ( 1 ) Dap Dung ( 4 ) ginra, Patsip Zup hte Aya Zup lapran kaw May praw, 9 ya shana daw hkying 4:40pm aten hte hkying 4:50pm aten laman Myen hpyen hpung ni a arung arai htaw Modo ( 8 ) hpe KIA hpyen hpung ni hkap gap ai kawn gasat majan byin wa ai.
Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 9 ) ginra, Di Ma Hka makau kaw mung May praw, 9 ya shana daw hkying 5:20pm aten hte hkying 6:00pm aten laman Myen hpyen dap Dapnu ( 55 ) kata na hpyen hpung ni hte KIA hpyen hpung ni gasat majan byin ai.
May praw, 9 ya shani hta sha hkying 1:30pm aten hta Htan Hpa Bum makau kaw shara jahkrat nga ai TNLA hpyen hpung ni hte Banggai Ja Maw maga kawn shamu shamawt lung wa ai Myen hpyen dap Dapnu ( 55 ) kata na hpyen hpung ni gasat majan byin ai lam na chye lu ai.
