KIA Dap Ba ( 4, 2, 8 ) ginra ni hta gasat majan byin

Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 9 ) ginra, Hu Hpyet kaw na Ja Chyai Yang de lung wa ai Myen hpyen hpung ni hpe May, 25 ya jahpawt hkying 8:55am aten hta KIA hpyen hpung ni kawn hkap gap gasat dat ai lam na chye lu ai.

Mung Yin mare lahta Nan Lin mare kaw May, 24 ya shani TNLA ni hte Myen hpyen hpung ni gasat majan byin ai hta Hpalap Sun kawn nhtang wa ai Na Ling mare na Slg. Jam Htai Asak ( 34 ning ) si sum mat ai lam na chye lu ai.

KIA Dap Ba ( 2 ) Dap Dung ( 20 ) ginra hta  May, 23 ya shani hkying 3:30pm aten kawn hkying 4:15pm aten laman Danai Hka hkan lung wa ai Myen hpyen n-gun ( 100 ) daram hpung ni hpe Sawng Hpre Hka Mazup mayan kaw KIA hpyen hpung ni Remote Bom ( 2 ) shawng adem bun nna Sinat kaji ni hte hkap gap ai kawn gasat majan byin ai. May, 24 ya jahpawt hkying 9:30am aten hte hkying 10:15am aten laman matut lai lung wa ai Myen hpyen hpung ni hpe Pau Hkying Hka Mazup mayan kaw KIA hpyen hpung ni kawn M-79MM, Sinat kaji ni hte hkap gap ai kawn kalang mi bai gasat majan byin ai lam shawng lam shi sawk ni kawn chye lu ai.

May, 24 ya shani hkying 2:00pm aten hta mung Nawng Mi mare Hka Hku maga kawn matut shamu shamawt  yu wa ai Myen hpyen n-gun ( 100 ) daram hpung ni hpe Nawng Mi mare dingsa mayan kaw KIA hpyen hpung ni kawn Nga Rung Bom ( 2 ) hkap adem bun ai hta Myen hpyen hpung ni kawn shani hkying 2:20pm aten du hkra sinat kaji kaba gap sharu bun nga ai lam na chye lu ai.

KIA Dap Ba ( 8 ) Dap Dung ( 26 ) ginra, Sezin makau Bum Run Post maga htu shadut lung wa ai Myen hpyen hpung ni hte KIA hpyen hpung ni May, 24 ya shani hkying 1:15pm aten hta gasat majan byin ai lam chye lu ai.