Myen hpyen dap ni KIA ni nga ai shara de ni kahtep sa wa

KIA Dap Ba ( 9 ) Dap Dung ( 6 ) ginra, Mupang Bum grup yin hte Sawng Hka, hka hku maga KIA hpyen hpung ni nga ai makau de Ginsi Byuha, Hk.M.Y ( 111 ) kata na hpyen n-gun ( 80 ) daram gaw, June 14 ya shani shamu shamawt ni kahtep wa ai lam, shawnglam shisawk ni kawn chye lu ai.

Ya na zawn Myen hpyen dap ni bai ni kahtep wa ai majaw, dai grup yin hkan na Yi sun bungli galaw sha ai mungshawa ni hprawng yen ai lam chye lu ai.

KIA Dap Dung ( 14 ) ginra hta mung, June 14 ya shana hkying 8:15pm aten hta Munghkawm mare kaw shara la nga ai Myen hpyen hpung hte Lidu lam Mile 8 Woi Su Pa kaw du nga ai hpyen hpung ni shara lahkawng kaw nna, Htangbra maga de sinat kaba hte gap bun ai lam chye lu ai.