Myen hpyen hpung ni KIA ginra de shamu shamawt lung wa
KIA Dap Ba ( 9 ) Dap Dung ( 6 ) ginra, Ja Ra Yang kaw nga ai Myen hpyen hpung ni June, 17 ya shani Hpakant, Nam Hpyit lam maga de shamu shamawt lung wa ai lam shawng lam shi sawk ni kawn chye lu ai.
June, 18 ya shani hta mung Myen hpyen hpung ni kawn Nam Ya Gate kaw lai wa lai sa Mungshawa ni hpe laja lana sawk jep nga ai lam chye lu ai.
Gang Dau Yang kawn rawt wa ai Myen hpyen n-gun ( 50 ) daram mung Lahkra Yang Seng Mai maga de June, 17 ya shani hkying 2:00pm aten hta shamu shamawt shang wa ai lam na chye lu ai.
Loi Seng mare, Jebu Pa kaw na Slg. Maran Yaw a hkauna pa kaw Myen hpyen hpung ni hkam tawn ai Bom ( 1 ) hpe June, 17 ya shani hkying 11:00am aten hta KIA hpyen hpung ni kawn shaw jasan kau ya ai lam na chye lu ai.
Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 9 ) ginra hta June, 17 ya shani Hu Hpyet Lawk ( 5 ) kaw nga ai Slg. Lashi Gam Asak ( 65 ning ) gaw nam de Mati tam sa ai kaw Myen hpyen hpung ni hkam tawn ai Bom kabye kapaw la ai hta la pai lata hte la pai lagaw kaw hkala la ai lam na chye lu ai.
