Lungseng nhkun gyi kaput lawm mat ai ni hta na shawla lu ai moimang hpe makoi mayang akyu hpyi hpawng galaw
Hpakant, Sawnghka hte Kahtan maw lapran na Mahar Company kaw July 14 ya shana daw hkying 2:00pm jan daram hta lungseng nhkun ga nna kaput lawm mat ai masha marai 100 jan hta na marai 18 a moi mang hpe July 15 ya shana maga hkying 3:00pm aten hta Lawngkang lup wa kaw makoi mayang akyu hpyi hpawng galaw ai lam, buga na salang langai shana wa ai.
Kaput lawm ai hta na hkala ai masha yawng marai 39 re. Ndai ni gaw tsi rung kaw tsi tsi nga ai, Lawnghkang tsi rung kaw marai 13, Hpakant tsi rung kaw marai 6, ngam ai marai 20 gaw hkala sawng ai majaw, Myitkyina tsi rung de wa tsi nga ai, marai 2 bai nnga mat sai lam, salang wa tsun ai.
Ga gyi wa ai mabyin hte seng nna salang wa tsun ai hta, “Mahar Company hte ( 111 ) Company gaw arau re. Shan a lapran kaw hka nawng kaba nga ai mungshawa ni gaw Mahar Company ni maga de htu nga ai re. ( 111 ) company ni bawm gap ganan dat ai majaw hka nawng kaw ga gyi bang mat ai, dai hka hte she lungseng htu nga ai masha ni hpe wa agre jahkrat kau dat ai masa pru ai ya nlu shaw shi ai moimang gaw 70,80 daram dang naw rai na re” nga nna salang wa tsun ai kawn chye lu ai.
