Miwa Mung de masha dut shalai ai hpawmi marai 2 hpe Myen Balik ni rim tawn
Miwa Gumsan Mungdan de masha dut shalai sha ai, Mugawng Kawa Yang mare na Jan. Roi Nu hte Mungmyit Sinli Ga ( Kachin Sub-State ) Munggu mare na Jan. Hkawn Ra yan hpe July 22 ya shani Myen Balik ni rim ahkyak la tawn ai lam na chye lu ai.
Jan. Roi Nu hte Hkawn Ra yan gaw, Mugawng Loi Law mare na shayi sha Kaw Nu Asak 17 ning hpe Miwa Jan tai yang gumhpraw 4,000,000 ( Sen Mali Shi ) lu ai ngu masu abawk hkalem la nna, Num sha a kanu kawa ni hpe gaw, jaram gumhpraw 500,000 ( Sen Manga ) jaw da nna Num sha hpe Jan. Roi Nu woi mat wa ai re.
Zinlum pawnghpawm Shagyit ( Gate ) kaw du ai shaloi ntsen nhten nna san jep dat yang masha dut shalai ai lam hpe lu jep shapraw ai hte Roi Nu a manang mara hkam Hkawn Ra hpe gaw Loi Je pru shang Shagyit ( Gate ) kaw rim la ai lam chye lu ai.
Ndai hpawmi yan gaw laiwa sai April shata hta mung, Mugawng Minkung mare na Seng Hkam @ Zinmar U asak 27 ning hpe ya na zawn masu abawk hkalem woi la nna, Miwa Mung Lung Lin mare na Miwa La langai kaw Yuan 66,000 ( Mun Kru Hkying Kru ) hte dut sha ga sai re.
Ya aten hta Jan. Hkawn Ra hte Roi Nu hpe Myen Balik ni kaw nna masha dut shalai makawp maga Pukma 24/25 hte Mugawng hkyuk kaw tara jawat rim tawn ai lam, buga masha ni kawn chye lu ai.
