Myen hpyen hpung ni mungmasha marai 1 hpe lam madun shangun na matu rim woi mat

KIA Dap Ba 3 Dap Dung 27 ginra Gawk Ngu Yang kaw nga ai Myen hpyen dap, Dapnu 88 kata na hpyen hpung ni, July 30 ya shani hkying 10:00am aten hta Maw Swi mare na salang langai hpe rim woi mat ai lam na chye lu ai.

Myen hpyen hpung ni gaw, Maw Swi, Chyam Ka mare hku shamu shamawt lai wa ai kaw salang Hka Htung Gam hpe lam madun na matu rim woi mat ai re hte ndai Myen hpyen hpung ni, Man Dat mare deng 10 kaw du nga ai lam, shawnglam shisawk ni kawn chye lu ai.

Salang Hka Htung Gam hpe ya aten du hkra dat ya ai lam nnga shi ai majaw, dum nta masha ni myit tsang nga ai lam, buga masha ni kawn chye lu ai.

Lai wa sai July 21 ya shani hta mung, KIA Dap Dung 27 ginra, Bang Hkam mare kawn Chyauk Hpya maga shamu shamawt lung wa ai Dap mying nchye ai Myen hpyen hpung ni, Hka Hkye Tang Jang Kawng kaw Cycle hte yu wa ai mungmasha La marai 2 hpe lam madun na matu shaga woi mat ai lam nga lai sai.