BGF hpyenla ni rim adup zingri woi tawn ai sara Mading Zai Dan Bawm Ying hpe bai dat ya

Sadung, Lumyawng mare post kaw nga ai BGF masat 1003 na hpyenla ni gaw, July 31 ya shani mara kata adup zingri nna, hpyen dap de rim woi tawn ai Waimaw Ginwang KBC Ramma Hpa-Awn Sara Mading Zai Dan Bawm Ying hpe, August praw 1 ya shani nawku hpung a kanu kawa makyin jinghku ni wa tsun nna bai dat ya sai lam na chye lu ai.

BGF hpyenla ni kawn Sara Mading Zaidan Bawm Ying hpe adup abyen htawng zingri ai hta sawng ai re majaw ya aten hta Waimaw tsi rung kaw tsi tsi hkamla nga ai, ra wa ai hta hkan nna Myitkyina de lai ra na re lam, buga masha ni kawn chye lu ai.

July 31 ya shani BGF hpyenla ni gaw mare kata hka hkawng shaw ai hta mare masha ni a nta nhpan hkan hkra wa ai majaw, sara Mading Zaidan Bawm Ying wa tsun ai hpe nra nna pawt share htawng zingri ai, dai hpe mu nna wa je tsun lawm ai Sadung Pa buga hpung na sara Lagyi Naw Awn hpe mung, htawng htwi da ai sha n-ga sara Mading Zaidan Bawm Ying a madu jan hpe mung shabyi bye ya ai lam na chye lu ai.

Ya na zawn mara kata adup abyen gyit zingri sharen tawn ai Sara Mading Zaidan Bawm Ying hpe lawan dat ya na matu hte njaw n ang ai hku galaw ai ni hpe Mungdan Asuya kaw nna tara nga ai hte maren ja ja ahkyak la ya na matu, ALL KACHIN YOUTH UNION ( AKYU ) ni kaw nna mung ndau shabra laika shapraw dat ai lam chye lu ai.