Wunpawng Ramma Uhpung Uhpawng ni pawng hpawm nna International Youth Day lamang galaw
Wunpawng Ramma Uhpung Uhpawng ni pawng hpawm nna ( 19 ) Lang ngu na International Youth Day lamang hpe August, 12 ya shana daw hkying 2:00pm aten kawn hkying 6:00pm aten du hkra Myitkyina Manau Wang, Majoi Gawknu kaw galaw ai re lam na chye lu ai.
International Youth Day lamang galaw ai a yaw shada lam gaw simsa lam hpe ra sharawng ai lam, Ramma hte shimlum lam ni hpe hpyi shawn lu wa na matu re nga nna Sr.Lasha Paw Lu kawn tsun ai.
Lamang hta Special Talk hku nna dai ning na International Youth Day a ga baw rai nga ai simsa lam hte shim lum lam, Ramma hte sut masa lam, International Youth Day a labau ni hpe tsun san lang dan ai lamang hte san htai lamang ni hpe USA Sr.Lum Tu hte Sarama Ester ni tsun sang lang dan ai lam na chye lu ai.
Myitkyina Ginwang kata na buga hpung Ramma ni, Hpyen yen Ramma ni, laga amyu baw sang Ramma ni hte saw shaga da ai Wai Maw Ginwang kata na Ramma ni yawng marai ( 2000 ) ram sa du shang lawm ai lam na chye lu ai.
Myitkyina Ginwang kata Man Hkring Kachin Youth Center kaw mung August, 11 ya shani hta Wunpawng Ramma ni hpe Ramma hte Shawng lam sut masa ngu ai ga baw hte sa du hpaji jaw ningmu jahpaw woi hka ja ai lam na chye lu ai.
Woi hka ja ai sara ni gaw Srn.Myitung Ying Nam ( Authorized Dealer of Jotun Paints Norway, Painting Service ), Sr. Hpauna Seng Hkum ( Director_ Gerrn Xingra Eco- tour , Travel ) hte USA Sr. Lum Tu ni re lam chye lu ai.
