Myen hpyen hpung hte TNLA, MNDAA pawnghpawm hpyen hpung ni gasat gala matut byin
Mungmyit Sinli Ga ( Kachin Sub-State ) KIA Dap Ba 6 Dap Dung 9 ginra, Sha-U bum ginwang daw, Namhkai ninghtawn kata hta shamu shamawt chyinglau hkawm nga ai Myen hpyen dap, Dapnu 11 kata na Hk.M.Y 219 hpyen hpung hte TNLA, MNDAA pawnghpawm hpyen hpung ni, August 15 ya jahpawt hkying 6:30am aten hta Hpakawn bum hte Kawng Ngawn bum kaw gasat gala majan byin ai lam, shawnglam na salang langai shana wa ai.
Hkying 8:00am aten hta gaw, Nam Hpalun maga kawn hpyen modo 4 hte n-gun jat lung wa ai, Dapnu 99 na Myen hpyen hpung ni hpe Hu Hpyet mare kaw wa jahkrat da ai, dai Myen hpyen hpung ni gaw Daknai mare kaw shamu shamawt du nga ai re.
Modo 3 gaw gasat majan byin ai hta hkala machyi hkrum ai masha ni hpe Kuthkai maga htaw yu wa sai lam nga ai, nga nna salang wa tsun ai. Ya aten hta KIA Dap Dung 9 ginra hta Myen hpyen n-gun 200 daram shamu shamawt nga ai lam chye lu ai.
