Gai Daw mare hte Htang Byu mare grup yin kaw Damya mya sha nga ai masha marai ( 4 ) hpe lu rim

KIA Dap Ba ( 3 ) Dap Dung ( 1 ) ginra, Man Maw Ginwang kata Htang Byu mare makau kaw August, 16 ya shani Nga Lauban Sing Ju a Nga htaw Modo hpe hkap jahkring ai shaloi nhkring ya majaw nlung hte Modo pat kabai ga kau ya nna hprawng mat wa ai lam na chye lu ai.

Hprawng mat wa ai masha ni hpe Nba Pa Balik dap ni kawn rim la nna san jep ai hta Gai Daw mare hte Htang Byu mare grup yin kaw Damya mya sha nga ai ni re hpe chye lu ai.

Rim la lu ai masha ni gaw, Kahtan Kawng mare na Shd. Labang Myu Awng Asak ( 22 ning ), Lana Zup IDPs Camp kaw na Shd. Labang Brang Din Asak ( 20 ning ), Gai Daw mare kaw na Shd. Labya Yaw Mai Asak ( 26 ning ) hte Mung Hkawng mare na Shd. Maran Naw Lum Asak ( 20 ning ) yawng marai ( 4 ) hpe lu rim sai lam chye lu ai.