Lashio Taing Mu kawn dingdung daw Pyi Tu Tsit ( P.T.Ts ) ningbaw yawng hpe shaga la nna zuphpawng woi galaw

Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 34 ) ginra, Lashio Y.M.Hk Taing Mu Major General Awng Zaw Aye kawn September praw 1 ya shani dingdung daw Pyi Tu Tsit ( P.T.Ts ) ningbaw yawng hpe shaga la nna zuphpawng woi galaw ai lam na chye lu ai.

Dai zuphpawng hta Major General Awng Zaw Aye tsun ai gaw, hpyen dap kawn jahkrat da ai tara ni hpe tup hkrak hkan sa ra na, P.T.Ts uphkang shara ni hta majan hte seng nna tau hkyen shajin tawn ra na hte tinang a hpyen hpung ni du wa yang garum ta gindun jawm shamu shamawt mat wa na lam ni hpe tsun ai lam, shawnglam shisawk ni kawn chye lu ai.

KIA Dap Ba ( 4, 6, 10 ) ginra ni hta mung, August 29 ya shani kaw nna Myen hpyen dap kawn hpyen n-gun law law hte htu shadut lung wa ai  majaw, dingdung daw daphpawm ni hte, shani shagu ngu na gasat gala majan byin nga ai re lam chye lu ai.