Chyoipra ai Udang shagrau poi Missa hkungga nawng jau lamang galaw

Laiza Jau Ginwang, Woi Chyai Bum kaw September 14 ya shani hkying 11:00am aten hta Chyoipra ai Udang shagrau poi hpaw hpawng lamang galaw nna, 12:00non aten hta Missa hkungga nawng jau ai akyu hpyi lamang hpe galaw ai lam chye lu ai.

Woi Chyai Bum hta Chyoipra ai Udang hpe laiwa sai 2002 ning September 14 ya shani Rev. Fr. Joseph Nbwi Naw shaman ai hte Hpun Udang hpe jun hpang ai. 2004 ning hta ya na Concrete Udang kaba tsaw de pe 25, nda de pe 10 re ai hpe gaw gap la lu sai hte shaning shagu Udang shagrau poi galaw ai hta dai ning rai yang 17 lang rai sai re.

Chyoi pra ai Udang shagrau poi hta Laiza Jau Ginwang kata na nawku hpung masha ni, kaga nawku hpung na hpung masha ni, Magam Dap, Makan Dap na magam gun ni, Manmaw Sara Daw Ginwang kata na Wa Jau, Ma Ma ni yawng marai 4000 jan shanglawm ai lam chye lu ai.