Mare komiti salang wa mare masha langai hpe nhkyi hte galun
Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 9 ) ginra, Kuthkai Ginwang, Namhkai Ninghtawn, Bang Kai Ja Maw mare kaw September 16 ya shani mare komiti amu madu salang Win Nai kawn, salang Bya Le hpe nhkyi hte galun da ai lam na chye lu ai.
Mabyin gaw, Bang Kai Ja Maw mare kata hpaw sharin nga ai lawu tsang jawng na saranum yan hpe, marai langai hpe shata mi Kyats 150,000 ( Sen Mi Mun Manga ) jaw na hte seng nna nta htinggaw mi hta 15,000 ( Mun Mi Hkying Manga ) hpra hta na matu, mare komiti salang ni hku nna mare masha ni hpe zuphpawng woi galaw ai.
Salang Bya Le gaw dinghku hta tam lu tam sha yakhkak ai majaw shata mi 15000 ( Mun mi hkying manga ) nlu bang ai, 5000 ( Hkying manga ) sha lu bang ai ngu tsun dang rang hkat wa ai kaw na, mare komiti amu madu salang Win Nai gaw pawt wa nna, salang Bya Le hpe nhkyi hte galun da ai re.
Nhkyi hte galun hkrum ai salang Bya Le hkala sawng ai majaw, ya aten hta Lashio tsi rung kaw tsi tsi hkamla nga ai lam, ginra shisawk ni kawn chye lu ai.
