Miwa Asuya ni, Mungdan jarit lai lamu ga htu di la
Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 36 ) ginra, Bang Sai Chyukuk Ninghtawn Hpai Kawng mare hte Miwa Mung Nawng Lung mare lapran na Mungdan jarit lai lamu ga hpe, September 19 ya jahpawt hkying 7:00am aten hta Miwa Asuya ni shara sa gashun madu la ai lam, Hpai Kawng mare masha ni kawn chye lu ai.
Myen Mung hte Miwa Mung lamu ga jarit masat da ai shara kaw na Myen Mung maga Kilomiter 30 daram Miwa Asuya ni Back-hoe hte shara sa ganaw htu la nna hpri hte concrete jaw masat hkyen nga ai re.
Miwa Asuya ni ya na zawn jarit tawt lai wa ai hpe Hpai Kawng mare mungshawa myit su salang ni sa tsun ai shaloi, Miwa ni tsun ai gaw ndai anhte a shara re ngu tsun nhtang wa ai.
Dai majaw Hpai Kawng mare salang ni gaw, Myen Asuya Bang Sai Myu Ne Mu ni hpe shana dat ai hte salang ni sa wa nna Miwa ni hpe ninghkap jahkring tawn da ai.
Myen hte Miwa Mungdan lahkawng a jarit shadaw hpe 1993 ning hta masat shagrin jun tawn da ai re.
Ndai mabyin hte seng nna du wa na 3 ya shani hta Myen hte Miwa Asuya lahkawng maga na salang ni tsun sang lang hkat na re lam chye lu ai.
Hpai Kawng mare na mungshawa ni gaw ndai jarit manghkang hpe lawan ai hku hparan ya na hpe ra sharawng nga ai lam, Hpai Kawng mare masha ni tsun shana wa ai kawn chye lu ai.
