( 1 ) lang na Laiza Muklum nawku hpung ( 3 ) na ramma fellowship hpawng lamang galaw

( 1 ) lang na Laiza Muklum kata na Hkalup nawku hpung, Kahtawlik nawku hpung, Anglican nawku hpung masum na ramma fellowship kanawn mazum hpawng lamang hpe, September 22 ya jahpawt hkying 9:00am aten kaw na shana daw hkying 5:00pm aten du hkra Nazaret Zinlawng hta galaw ai lam chye lu ai.

Ramma fellowship kanawn mazupm hpawng a yaw shadam ai lam gaw, Anglican nawku hpung, Hkalup nawku hpung, Kahtawlik nawku hpung masum na ramma ni, makam masham n-ginghka ai sha shinggan bungli, kata bungli ni hte rawt jat na magam bungli ni hta grau nna hkau chyap wa na matu yaw shada ai re lam, ramma hpawng shabyin shatai komiti ningbaw sara Nhkum Zau Myat tsun ai.

Ginjaw Htunghking Magam Dap Lithkam Du Kaba Chyana Zau Awn  kaw nna mung, Wunpawng Htunghking shachyen shaga ai lam hte seng nna sharin ya ai. Dai hpang ginsup lamang ni galaw nhtawm, Muklum kata maza hta san seng lam hpe hkying hkum mi galaw na re.

Hpawng hta ramma ni yawng marai 209 tup sa du shanglawm ai.

Shana hkying 7:00pm aten hta gaw Sinpraw Majoi Manu Wang Gawknu kaw yu ngwi pyin ra lamang galaw na re lam chye lu ai.