Jawng ginlung ginsup poi, hpaw hpawng lamang galaw

Laiza Muklum kata na laika sharin jawng ni rai nga ai lahta tsang jawng, lapran tsang jawng, Sama Ginwang Sasana lahta tsang jawng, Mung Lai Hkyet lawu tsang jawng, IDPs Lawu tsang jawng ni a 2018-2019 hpaji ladaw ginlung ginsup poi hpaw hpawng lamang hpe September 24 ya shana daw hkying 2:00pm aten hta Laiza Muklum Zup Awng Simsa Ginsup Gawdin Pa hta galaw ai lam chye lu ai.

Jawng ginlung ginsup poi lamang hpe Laiza Muklum hpaji rung a masing kata, Laiza Muklum hpaji rung hte Laiza Muklum jawng komiti ni pawnghpawm nna woi awn ginsup ai poi rai nga ai. Ndai ginsup poi hpe September 28 ya shani ginsup ginchyum dat na re.

Ginsup lam a yaw shada lam gaw, ( 1 ) Kaji ten kaw na ginsup shingjawng ai hta myit maju jung nna, shinggyim wuhpawng kaba de lahkam sa wa chye lu na matu, ( 2 ) Ginsup ningtawn let mungkan man hta myusha mying dan hkung manu dan ai Mungdan masha law law tai wa lu na matu, ( 3 ) Nanghpam lu sha hpe tsepkawp ninghkap chye ai ramma ni byin tai lu na matu,( 4 ) Hkamja zetlet ai jawngma ni rai nna, du na ten hta hkamja zetlet ai Mungdan masha ni rai wa lu na matu,( 5 ) Laiza Muklum kata na jawng ni yawng hta magam gun nga ai sara, saranum ni shada magam bungli shagu hpe grau grau myit hkrum mang rum let, ta gindun galaw sa wa lu na matu, yaw shada let galaw sa wa ai re lam, ginsup komiti ningbaw mung rai, Laiza Muklum Hpaji Du, Saranum Kaba Maran Nang Tawng tsun ai.

Ginsup hpan ni gaw, Gawdin, Ta din, Ka din, U mun, Table Tennis, ni hte ginsup hpan ga baw 5 kaw na, ginsup hpan ga baw 16 bai garan nna ginsup sa wa na re. Gawdin ginsup ai hta kaji pang, 11 ning npu, kaba pang 15 ning npu masat da ai, Ndai ginlung ginsup poi gaw kaji dik ai ni hpe shapan ai madung re majaw, jawng 5 kaw na asak 11 ning a npu na ni yawng shanglawm lu na matu, Ninggang gashun ai lamang hpe bang da ai rai nna, ngam ai ginsup hpan hta gaw asak masat ai lam nnga ai nga nna Saranum Kaba Maran Nang Tawng tsun ai.

Laiza Muklum Uphkang Du, Salang Kaba Sabaw La Zau kaw nna mung, shatsam mungga tsun ai hta, Jawng langai hte langai myit hkrum makai hkak ai hte shada kanawn mazum hkrak na matu, ningtawn ai jawngma paw pru na hte hkamja zetlet ai ramma shayi shadang ni tai wa na matu, Amyu Mungdan a matu gawng malai tai lu ai, myu tsaw myit rawng ai kashu kasha ni tai wa lu na matu anhte Wunpawng Mungdan hte Wunpawng Amyu sha ni a myit mang hkrum ai lam, anhte a ningtawn ai lam hpe Mungkan de shadan shadawng lu na matu galaw ai re lam, shatsam mungga jaw la ai. Ginsup poi hta shanglawm ai jawngma yawng 382 tup re lam chye lu ai.