KIA hte Myen hpyen hpung ni gasat gala majan byin

Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 36 ) ginra, Kawng Lim Ninghtawn, Mung Noi Bum kaw September 30 ya shani hkying 10:00am aten kawn hkying 10:50am aten laman KIA hpyen hpung hte Myen Hpyen Dap, Hk.L.Y ( 218 ) na hpyen hpung ni gasat gala majan byin ai lam na chye lu ai.

Myen hpyen hpung ni, n-gun 70 daram hte KIA hpyen hpung ni shara la nga ai Mung Noi Bum de htu shadut lung wa ai majaw, hkap shingla gasat dat ai kawn gasat majan byin ai re lam, shawnglam shisawk ni kawn chye lu ai.

Dai ni October praw 2 ya shani hta KIA Dap Ba ( 6 ) Dap Dung ( 9 ) ginra, Nam Um mare kaw du nga ai Myen hpyen dap ni gaw, Nam Um mare masha ni a yup tung jahpan hte masha jahpan hpe jep nga ai lam, ginra shisawk ni kawn chye lu ai.