KIA Dap Dung ( 14 ) ginra hta ja htu sha nga ai lauban ni hpe bungli jahkring na matu Hk.L.Y ( 297 ) hpyen dap ni tsun
KIA Dap Ba ( 2 ) Dap Dung ( 14 ) ginra, Jahtu Zup mare makau kaw dap jung shara jahkrat nga ai Hk.L.Y ( 297 ) hpyen dap ni kawn, October 9 ya shani Lawt Ja ja maw, Ja Wang ja maw hte Nga Gam ja maw hkan ja htu sha nga ai lauban ni hpe bungli galaw jahkring kau na matu tsun ai lam chye lu ai.
Hk.L.Y ( 297 ) dap ni kawn ja htu lauban ni hpe tsun ai hta M.P.Hk de na salang ni Helicopter hte lung wa na re majaw bungli yawng jahkring kau na hte, back-hoe ni hpe lawan makoi kau na matu tsun ai majaw, bungli ni jahkring kau nna back-hoe ni hpe makoi kau ai lam, Jahtu Zup mare na salang langai tsun dan ai kawn chye lu ai.
Bungli galaw licence lu ai ni gaw hprawng ai lam n nga ai, licence nlu ai ni gaw masha kaba ni du wa jang yawng hprawng ai, nkau gaw ya she licence shawk da ai ni nga ai, licence hte galaw sha wa ai gaw shata 2 daram sha naw re. Lai wa sai aten hta gaw, ni nawn ai hpyen dap ni hte jahkrup nna galaw sha ai ni hkrai re lam, salang wa matut tsun ai kaw na chye lu ai.
