KIA hpyen hpung hte Myen Dapnu ( 99, 101 ) kata na hpyen hpung ni, shara 2 hta gasat gala majan byin
Mungmyit Sinli Ga ( Kachin Sub-state ) KIA Dap Ba ( 4 ) Dap Dung ( 8 ) ginra, Namhpakka Ginwang, KIA Dap Dung ( 8 ) hpyen hpung ni shara la nga ai Pang Nai Bum de, Myen Dapnu ( 99 ) kata na hpyen hpung ni htu lung wa ai majaw, October shata 11 ya jahpawt hkying 9:30am aten hta KIA hpyen hpung ni hkap shingla gasat dat ai kawn gasat gala majan byin ai lam, shawng lam shi sawk ni kawn chye lu ai.
KIA Dap Ba ( 8 ) Dap Dung ( 5 ) ginra, Mungnyang Ginwang, Sinbu Ninghtawn, Hkawng Me mare makau kaw mung, KIA Dap Dung ( 5 ) na hpyen hpung hte Myen Dapnu ( 101 ) kata na hpyen hpung ni October shata 11 ya jahpawt hkying 8:15am aten kawn minute 30 daram gasat gala majan byin ai lam chye lu ai.
Gasat gala majan byin ai majaw, Hkawng Me mare na mungshawa ni nam kata de hprawng yen mat ai lam, Myen hpyen dap ni gaw hpyen n gun law law hte KIA Dap Ba ( 8 ) ginra hta shamu shamawt ding yang rai nga ai majaw majan kaba byin wa na hpe mungshawa ni hkrit tsang nga ai lam, ginra shi sawk ni kawn chye lu ai.
