Mungmasha ni a Ja htu jak 9 hte modo 3 hpe Myen hpyen dap ni rim mat wa

KIA Dap Ba ( 3 ) Dap Dung ( 12 ) ginra, Shwigu Ginwang, Ngu Lin Wa mayan hta shamu shamawt du nga ai Hk.L.Y ( 71 ) dap na Major Ye Thun Oo woi awn hpyen hpung ni gaw, October shata 23 ya shani hta Chauk Hpya Ja maw hte Man Bung Ja maw kaw Ja htu nga ai mungmasha ni a Ja htu jak 9, Tung Fung modo 1 hte, Pajero modo 2 hpe rim mat wa ya ai lam, ginra shi sawk ni kawn chye lu ai.

Lai wa sai October shata 5 ya shani hta mung, Hk.L.Y ( 71 ) dap ni sha Ngu Lin Wa lawu Ja maw na Ja htu jak 8 hpe rim mat wa ai sha n-ga October 16 ya shani hta mung, Hkaw Tu mare na salang Moe Kyaw Oo a Back-hoe ( 1 ), Wan Bu mare na salang Tin Aye a Back-hoe ( 1 ) hte, Miwa company ni a Back-hoe ( 2 ) hpe rim zing la kau ya ai lam chye lu ai.