KIA hpyen hpung hte Myen hpyen hpung ni gasat gala majan byin
KIA Dap Nawng Dap Dung hpyen hpung ni shara jahkrat ai Nmwi Zup Post maga de, dap mying n chye ai Myen hpyen hpung ni htu shadut shang wa ai majaw, November 7 ya jahpawt hkying 7:00am aten kawn hkying 10:35am aten du hkra KIA hpyen hpung ni hkap shingla gasat dat ai kawn gasat gala majan byin ai lam, shawng lam shi sawk ni kawn chye lu ai.
Mungmyit Sinli Ga ( Kachin Sub-state ) KIA Dap Ba ( 10 ) Dap Dung ( 2 ) ginra hta shamu shamawt nga ai Myen Hpyen Dap, Dapnu ( 99 ) kata na hpyen n-gun ( 80 ) daram mung, KIA hte MNDAA Kukang pawng hpawm hpyen hpung ni shara jahkrat nga ai Loi Tawng mare hte Lung Wai mare lapran na Shawnghkan Hkaraw maga de htu shadut sa wa ai majaw, November 6 ya shana hkying 7:25pm aten hta gasat gala byin ai re.
Gasat gala byin ngut ai hpang Myen hpyen hpung ni gaw, hpang lam de bai htingnut mat wa nhtawm, November 7 ya jahpawt hkying 1:30am aten hta Myen hpyen hpung ni KIA hte MNDAA pawng hpawm hpyen hpung ni nga ai shara de, sinat kaba 5 lang shawng gap bun nna bai htu lung wa ai majaw, hkying 7:30am aten hta matut gap hkat ai lam, shawng lam shi sawk ni kawn chye lu ai.
