Myen hpyenla ni IDP camp na mungmasha marai 2 hpe adup zing ri da
Mungmyit Sinli Ga ( Kachin Sub-state ) Kutkai Muklum daw 6 IDP camp II kaw nga ai mungmasha marai 2 hpe November shata 26 bat hpang 1 ya shana daw hkying 1:30pm aten hta Hk.L.Y 45 dap na hpyenla ni adum zing ri da ai lam chye lu ai.
Adup zing ri hkrum ai yan gaw, Salang Nhkum Zau Tawng asak 40 ning hte Shadang Lahpai Zau Wawm asak 20 ning yan re.
Salang Nhkum Zau Tawng hte Shadang Lahpai Zau Wawm yan gaw Man Pying mare kaw galaw na Ta Din ginsup shingjawng poi hta shang lawm na matu yu ai ten Man Mau mare lam kaw Hk.L.Y 45 dap ni hkap jahkring sawk jep yang Slg. Zau Tawng a phone kaw KIA mahkawn ka hkrang video clip rawng taw ai majaw, KIA hpyenla re ngu hkamla shangun nna, lahkawng yan hpe Myi pat kau ya nhtawm, hpun tawng hte adup zing ri da ai lam, hpyen yen dabang na Salang langai tsun ai.
Salang Zau Tawng a baw kaw na sai mung pru ai, lahput mung nmai malan ai, Shadang Zau Wawm a lagaw hkan mung hpye taw ai, ndai yan hpe lawan dat ya na matu, Camp lit hkam ni hku nna Kutkai Muklum Uphkang Du hte Man Pying Uphkang Salang ni hpe hpyen dap de shana shangun ai hpang, hkying 5:00pm aten hta camp de bai du wa ai, ndai yan gaw KIA hpyenla n re IDP camp kaw shanu nga ai mungshawa she re ai lam, salang wa matut tsun ai.
Machyi hkrum ai yan gaw tsi rung de tsi tsi hkamla ai lam gaw nnga ai raitim, nta kaw nga nna bum tsi ni shadu lu nga ai lam chye lu ai.
Ya aten hta Myen hpyen dap ni gaw lai wa lai sa mungshawa ni a modo, cycle, phone ni hpe laja lana sawk jep nga ai re. Lai wa sai 24 ya shani hta mung, Ga Leng mare lapran na Hu Nawng mare hta Dapnu 99 hte Hk.L.Y 45 dap ni gaw, lai wa lai sa mungshawa ni hpe laja lana sawk jep nga ai.
