Hpung woi sara langai lam kaw damya mya hkrum
Mungmyit Sinli Ga ( Kachin Sub-state ) Nam Um mare makau kaw November shata 28, bat hpang 3 ya jahpawt hkying 10:00am aten hta Myen hpyenla marai 2 gaw, Munggu Buga na Hpung woi Sara Langjaw Gam Seng hpe damya mya ai lam chye lu ai.
Sara Langjaw Gam Seng gaw Lashio de sharin hpawng sa shang lawm na matu, Munggu kaw nna Muse lam hku cycle hte yu wa yang, Mungbaw hka mahkrai kaw na du yang, shinggan hking hking da ai Myen hpyenla marai 2 cycle hte hkan nang yu wa ai.
Nam Um mare shinggan kaw du ai hte Myen hpyenla yan gaw Sara hpe mungmasa nhkrak ai anhte a Du wa hpe shiga naw wa jaw u nga tsun nna, Dima mare wa ai lam de woi sa mat ai, hpun shalawng du ai hte na a a’rung a’rai yu yu ga kapaw wa ai baw hpa lawm ai kun ngu hpaw shangun ai, daihpang n hpye kaw rawng ai gumhpraw shaw la kau ya nna cycle hpe mung jawn hprang mat wa ya ai lam, Salang langai tsun ai.
Gashun la kau ya ai hta n hpye kaw na lap 500,000 ( Sen Manga ), cycle box kaw bang da ai phone hte kanu kawa ni tsi jawng lung ai jawngma hpe shagun ai gumhpraw ni lawm mat wa ai, Sara hpe ta du ai lam gaw nnga ai, Sara gaw ya aten Kuthkai Muklum jinghku ni a dum nta kaw du taw ai lam, Salang wa matut tsun ai kaw na chye lu ai.
