TNLA hte Myen hpyen hpung ni gasat gala matut byin

TNLA Dap Ba 1 ginra, Mandung Ginwang hta shamu shamawt nga ai Myen Dapnu 88 kata na Hk.L.Y 77 hpyen hpung hte TNLA hpyen hpung ni November shata 29 ya shani Wing Pat mare lahta kaw gasat gala majan byin ai lam, shawng lam shi sawk ni kawn chye lu ai.

November shata 28, bat hpang 3 ya shani hta mung, Mandung ginwang, Man Pying mare makau kaw TNLA hpyen hpung hte Myen Dapnu 88 kata na Hk.M.Y 481 dap ni gasat gala majan byin ai re.

Lahta Sammung hte Mungmyit Sinli Ga ginra nkau hta gasat gala majan matut manoi byin nga ai majaw, mungshawa marai 2,000 jan tinang shim dum ai shara de hprawng yen ra mat ai lam, buga masha ni kawn chye lu ai.